🔴 साताऱ्यात शिवसेना–राष्ट्रवादीची अग्निपरीक्षा

1️⃣ जिल्हा परिषदेचा हिशोब विधान परिषदेत चुकता होणार ?
2️⃣ “सातारी बाणा” की “महायुती धर्म” ?
3️⃣ भाजपसमोर नांगी टाकणार की डंक मारणार ?

सातारा–सांगली विधानपरिषद निवडणुकीच्या पार्श्वभूमीवर साताऱ्यातील राजकीय वातावरण चांगलेच तापले असून, महायुतीतील अंतर्गत समीकरणांवर सर्वांचे लक्ष केंद्रित झाले आहे. विशेष म्हणजे, सातारा जिल्हा परिषद अध्यक्षपदाच्या निवडणुकीदरम्यान घडलेल्या राजकीय घडामोडींचा हिशोब आता विधान परिषद निवडणुकीत चुकता होणार का, याची जोरदार चर्चा राजकीय वर्तुळात रंगली आहे.

जिल्हा परिषद अध्यक्षपदाच्या निवडणुकीत पालकमंत्री शंभूराज देसाई यांनी पुढाकार घेऊनही महायुतीची एकजूट कायम राहिली नव्हती. आवश्यक संख्याबळ नसतानाही शिवसेना आणि राष्ट्रवादीच्या भूमिकेला दुय्यम स्थान देत भाजपचा अध्यक्ष करण्यात आल्याची भावना मित्रपक्षांच्या कार्यकर्त्यांमध्ये निर्माण झाली होती. त्याचवेळी अध्यक्षपदाच्या निवडणुकीत झालेला अभूतपूर्व राडा आणि झालेला पराभव पालकमंत्री शंभूराज देसाई तसेच मंत्री मकरंद पाटील यांच्या जिव्हारी लागल्याची चर्चा राजकीय वर्तुळात होती.

यामुळे आता विधान परिषद निवडणुकीत भाजपला अपेक्षित असलेले महायुतीचे एकसंघ मतदान प्रत्यक्षात होते की नाही, याकडे सर्वांचे लक्ष लागले आहे. “सातारी बाणा” जपत स्थानिक स्वाभिमानाला प्राधान्य दिले जाणार की “महायुती धर्म” पाळत भाजपला साथ दिली जाणार, हा सध्या चर्चेचा केंद्रबिंदू ठरला आहे.

पालकमंत्री शंभूराज देसाई आणि मंत्री मकरंद पाटील हे भाजपसमोर नांगी टाकणार की आपल्या राजकीय ताकदीचा डंक मारत जिल्हा परिषद अध्यक्षपदाच्या निवडणुकीतील घडामोडींचा राजकीय वचपा काढणार, याबाबत उत्सुकता शिगेला पोहोचली आहे. त्यांच्या भूमिकेचा परिणाम केवळ या निवडणुकीपुरता मर्यादित राहणार नसून भविष्यातील महायुतीच्या राजकारणावरही होऊ शकतो, अशी चर्चा आहे.

दुसरीकडे, या निवडणुकीत अभयसिंह जगताप बाजी मारणार की धैर्यशील कदम विजयाचा झेंडा फडकावणार, याकडेही राजकीय विश्लेषकांचे लक्ष लागले आहे. स्थानिक स्वराज्य संस्थांमधील संख्याबळ, पक्षांतर्गत रणनीती आणि मित्रपक्षांच्या भूमिकांवर या निवडणुकीचे गणित अवलंबून असल्याचे मानले जात आहे.

या संपूर्ण राजकीय संघर्षात मंत्री जयकुमार गोरेंची प्रतिष्ठाही पणाला लागल्याचे बोलले जात आहे. महायुतीतील समन्वय टिकवण्याचे आव्हान, मित्रपक्षांतील नाराजी आणि स्थानिक पातळीवरील राजकीय समीकरणे यांची खरी परीक्षा या निवडणुकीत होणार असून, सातारा–सांगली विधानपरिषद निवडणुकीचा निकाल राज्याच्या राजकारणाला नवी दिशा देणारा ठरू शकतो.

Post Views: 30