फलटण नगरपालिकेची निवडणूक नुकतीच लागलेली आहे. सोमवार दिनांक 10 नोव्हेंबर 2025 पासून उमेदवारी अर्ज भरण्यासाठी सुरुवात झालेली आहे. अशा परिस्थितीमध्ये फलटण नगरपालिका निवडणुकीमध्ये प्रजा गटाची नेमकी भूमिका काय असणार, याबाबत विविध माध्यमांनी विचारणा केल्यानंतर प्रजा गटाचे अध्यक्ष प्रदीप झणझणे यांनी आपली भूमिका स्पष्ट केली.

माध्यमांशी बोलताना प्रदीप झणझणे यांनी सांगितले की फलटण तालुक्यातील जनतेला अपेक्षित असणारी व योग्य ठरणारी भूमिका प्रजा गटाची असणार आहे. नेहमीप्रमाणे जनतेचा आतला आणि खरा आवाज ऐकूनच प्रजा गट आपली भूमिका ठरवणार आहे. येत्या काही दिवसांमध्ये प्रजा गटाचे सर्व कार्यकर्ते, फलटण शहर व फलटण तालुक्यातील प्रजा गटाचा असणारा एक मोठा चाहता वर्ग, तसेच शहरातील नागरिक या सर्वांशी विचारविनिमय केल्यानंतर कोणत्या गटाला किंवा पक्षाला पाठिंबा द्यायचा यासाठीची भूमिका प्रजा गट जाहीर करणार असल्याचे प्रदीप झणझणे यांनी स्पष्ट केले.

लोकशाहीतील सर्वात मोठी शक्ती असलेली “जनता” सर्व स्तरामध्ये सर्वोच्च असुन आपण व आपला संपूर्ण प्रजा परिवार मागील दोन दशकांपासून फलटण तालुक्यातील जनतेसाठी निस्वार्थपणे काम करत आहे. प्रजा गटाची भूमिका फलटण नगरपालिका निवडणुकीत निर्णायक ठरणार असल्याचे प्रजा गटाचे अध्यक्ष प्रदीप झणझणे यांनी यावेळी स्पष्ट केले.