विद्यार्थ्यांनी उत्साहाने नोंदवला सहभाग

लोणंद : आजच्या वेगाने बदलणाऱ्या तंत्रज्ञानाच्या युगात विद्यार्थ्यांनी आधुनिक साधनांचा वापर करून आपले ज्ञान व कौशल्य अधिक कार्यक्षम पद्धतीने वाढवावे या उद्देशाने नर्मदा कॉम्प्युटर्स, लोणंद यांच्या वतीने व संस्थेच्या संचालिका सौ. प्रियांका निगडे यांच्या मार्गदर्शनाखाली लोणंद येथील मालोजीराजे विद्यालयात इयत्ता सहावी ते दहावीच्या विद्यार्थ्यांसाठी कृत्रिम बुद्धिमत्ता (Artificial Intelligence – AI) विषयक कार्यशाळा आयोजित करण्यात आली. तीन दिवस चाललेल्या या उपक्रमात सुमारे 130 ते 150 विद्यार्थ्यांनी उत्साहाने सहभाग नोंदवला.

या कार्यशाळेत विद्यार्थ्यांना कृत्रिम बुद्धिमत्तेची मूलभूत माहिती देऊन तिचा शैक्षणिक व दैनंदिन जीवनातील कार्यक्षम वापर कसा करता येईल याबाबत सविस्तर मार्गदर्शन करण्यात आले. विद्यार्थ्यांना ChatGPT, Gemini, Heygen यांसारख्या अत्याधुनिक साधनांची माहिती देऊन प्रत्यक्ष वापराची संधीही देण्यात आली. या माध्यमातून विद्यार्थ्यांनी संवाद लेखन, सादरीकरण निर्मिती, तसेच शैक्षणिक उपक्रमांसाठी ए.आय.चा प्रभावी वापर प्रत्यक्ष अनुभवला.

या कार्यक्रमासाठी विद्यालयाचे प्राचार्य श्री. चंद्रकांत जाधव सर यांनी विशेष परवानगी व प्रोत्साहन दिले. तसेच श्री. ज्ञानेश्वर जाधव सर यांनी कार्यशाळा यशस्वी होण्यासाठी विशेष सहकार्य केले. विद्यार्थ्यांमध्ये कृत्रिम बुद्धिमत्तेबाबत जागरूकता निर्माण करून त्यांना नव्या तंत्रज्ञानाशी जुळवून घेण्यासाठी ही कार्यशाळा उपयुक्त ठरल्याचे मत विद्यालयीन शिक्षकवर्ग तसेच आयोजकांनी व्यक्त केले.