संपादक : प्रदीप झणझणे
फलटण तालुक्यातील हिंगणगाव पंचायत समिती गणाची निवडणूक ही “सर्वसाधारण (महिला)” या वर्गा साठी आरक्षित झाली असुन या पार्श्वभूमीवर शेरीचीवाडी गावचे सुपुत्र व पंचक्रोशीसह फलटण पश्चिम भागातील लोकप्रिय व्यक्तीमत्व सतीश शिंदे यांनी हिंगणगाव पंचायत समिती गणाच्या क्षेत्रातील छोटा – मोठा जनाधार असलेल्या सर्व प्रमुख व्यक्ती, मित्र परिवार, नातेवाईक व सातत्याने संपर्कात असलेल्या जनतेच्या गाठी-भेटी घेतल्यानंतर हिंगणगाव पंचायत समिती गणाची निवडणूक लढवण्यासाठी त्यांच्या पत्नी सौ. सुनिता सतीश शिंदे यांच्या उमेदवारीची इच्छा राष्ट्रवादी काँग्रेस पार्टीतील वरिष्ठ नेत्यांकडे व्यक्त केली असल्याचे समाज माध्यमांशी बोलताना राष्ट्रवादी काँग्रेस पार्टीचे (अजित पवार गट) फलटण तालुका उपाध्यक्ष सतिश शिंदे यांनी सांगितले.
सतीश शिंदे यांचा फलटण तालुक्यातील लोकसंपर्क दांडगा असून सामाजिक व राजकीय क्षेत्रातील त्यांचा सहभाग वाखाणण्याजोगा आहे. मागील काळात लोकनेते स्व. हिंदुरावजी नाईक निंबाळकर यांच्या नेतृत्वाखाली त्यांनी जवळपास १५ ते २० वर्षे एकनिष्ठ राहुन लोकसेवेचे महत्वाचे काम केले आहे. पुढे त्यांनी महाराष्ट्र नवनिर्माण सेनेच्या माध्यमातून फलटण तालुका उपाध्यक्ष पदावर जवळपास दहा वर्षे सक्रियपणे कार्यरत राहून लोकांना न्याय व सेवा देण्याचे महत्त्वपूर्ण कार्य केले असल्याचे सतीश शिंदे यांनी स्पष्ट केले.
अलीकडच्या काळात ग्रामीण भागातील रखडलेली विकासाची कामे मार्गी लावण्यासाठी “विकास पुरुष” म्हणून ओळखल्या जाणाऱ्या महाराष्ट्र राज्याचे उपमुख्यमंत्री व राष्ट्रवादी काँग्रेस पार्टीचे अध्यक्ष अजित पवार यांच्या नेतृत्वाखाली, तसेच मंत्री मकरंद पाटील व राज्यसभा खासदार नितीन पाटील, सातारा जिल्हाध्यक्ष बाळासाहेब सोळस्कर व फलटण तालुका अध्यक्ष श्रीमंत शिवरुपराजे खर्डेकर, तसेच फलटण तालुक्यातील सर्व वरिष्ठ नेते-पदाधिकारी यांच्या प्रमुख उपस्थितीत राष्ट्रवादी काँग्रेसमध्ये प्रवेश केला. फलटण-कोरेगाव विधानसभा मतदारसंघातील राष्ट्रवादी काँग्रेसचे आमदार सचिन कांबळे पाटील यांना निवडून आणण्यामध्ये देखील त्यांचे योगदान आहे. सध्या सतिश शिंदे हे राष्ट्रवादी काँग्रेस पक्षामध्ये फलटण तालुका उपाध्यक्ष या महत्त्वाची जबाबदारी असलेल्या पदावर कार्यरत असून लोकांच्या सुख दुःखामध्ये सहभागी होत लोकांचे प्रश्न, त्यांच्या अडचणी सोडवत राष्ट्रवादी काँग्रेस पक्ष मजबूत करण्याचे महत्त्वपूर्ण कार्य ते पार पाडत आहेत.
फलटण पश्चिम भागात स्थानिक पातळीवर लोकांशी सातत्याने संपर्कात असल्यामुळे त्यांचा जनाधार प्रचंड मोठा आहे. हिंगणगाव पंचायत समिती गणासाठी निवडणुकीच्या राजकीय आखाड्यात राष्ट्रवादी काँग्रेस पार्टीचे (अजित पवार गट) फलटण तालुका उपाध्यक्ष सतीश शिंदे यांनी त्यांच्या पत्नी सौ. सुनिता सतीश शिंदे यांच्या उमेदवारीची इच्छा व्यक्त केल्यामुळे राष्ट्रवादी काँग्रेस पक्षासह महायुतीच्या नेत्यांना त्यांच्या या भूमिकेचा नक्कीच विचार करावा लागणार असल्याची चर्चा जनतेमध्ये सुरू आहे.
