धैर्यशील लोखंडे, उपाध्यक्ष सातारा जिल्हा,
आम आदमी पार्टी.

आम आदमी पार्टीचे अध्यक्ष व दिल्लीचे माजी मुख्यमंत्री अरविंद केजरीवाल हे महाराष्ट्रामध्ये आपल्या पक्षाची ताकद वाढवण्याचे प्रयत्न करत असताना सातारा जिल्ह्यातील फलटण तालुक्यामध्ये त्यांचे धडाडीचे कार्यकर्ते व आपचे सातारा जिल्हा उपाध्यक्ष पदावर कार्यरत असलेले धैर्यशील अंकुशराव लोखंडे यांच्यावर प्राणघातक हल्ला करण्याचा प्रयत्न झाल्याची घटना शुक्रवारी दुपारी घडली. घडलेली घटना फलटण तालुक्यासाठी अशोभनीय असून फलटण तालुक्याच्या नावलौकिकाला हा एक प्रकारचा धक्का असल्याची चर्चा सर्वत्र सुरू आहे. या समाजविघातक घटनेचा फलटण तालुक्यातील सर्व स्तरातून निषेध होत आहे.

फलटण : धैर्यशील लोखंडे हे आपल्या चार वर्षांच्या मुलीसोबत फलटण विमानतळ परिसरातून जात असताना तोंडाला रुमाल बांधलेल्या तीन अज्ञात व्यक्तींनी हातामध्ये लाकडी दांडके घेऊन आपचे उपाध्यक्ष धैर्यशील लोखंडे यांच्यावर हल्ला करण्याचा प्रयत्न केला. परंतु घडत असलेल्या अतिरेकी हालचालींचा अंदाज येताच प्रसंगावधान राखून आपल्यावर हल्ला होणार असल्याची जाणीव होताच चपळाईने हल्लेखोरांना चकवा देत लोखंडे यांनी हल्लेखोरांपासुन सुरक्षित अंतरावर दूर गेल्यानंतर तात्काळ ११२ क्रमांक डायल करत पोलीसांशी संपर्क साधला. घटनेची माहिती मिळताच पोलिसांनी घटनास्थळी धाव घेतली. मात्र अज्ञात संशयितांनी तेथून पळ काढला. या गंभीर प्रकरणात तीन अज्ञातांविरुद्ध फलटण पोलिस ठाण्यात लेखी तक्रार केली असल्याचे आपचे सातारा जिल्हा उपाध्यक्ष धैर्यशील लोखंडे यांनी माहिती दिली.

परंतु पोलीसांनी त्या तीन अज्ञातांविरुद्ध एफ आय आर दाखल करून त्यांचा लवकरात लवकर शोध घेऊन त्यांना योग्य ते कठोर शासन करावे अशी मागणी धैर्यशील लोखंडे यांचेसह फलटण तालुक्यातील आम आदमी पार्टीच्या पदाधिकारी व कार्यकर्त्यांनी केली आहे. सदर घटना गंभीर असुन घडलेल्या घटनेचा सर्व तपशील आम आदमी पार्टीचे अध्यक्ष व माजी मुख्यमंत्री अरविंद केजरीवाल यांना कळवल्याचे आपच्या पदाधिकाऱ्यांनी सांगितले.

आपल्या भारत देशातील लोकशाही व संविधानाने दिलेल्या स्वातंत्र्य व अधिकारान्वये, मागील वर्षी झालेल्या लोकसभा व विधानसभा निवडणुकीत आम्ही ज्या उमेदवारांसाठी किंवा पक्षासाठी प्रचाराची कामे केली, त्या गोष्टींचा राग मनात ठेवून काही जण अजूनही नाराज दिसत आहेत. तसेच ढवळ गावातील रेशनिंग व देवस्थानचा विषय असेल किंवा आम्ही लोकांसाठी जे काही सामाजिक कार्य करत आहोत यावर असंतुष्ट व असमाधानी असलेले लोक अशा प्रकारचे भ्याड हल्ले व कट कारस्थान करत असल्याचे सातारा जिल्हा आम आदमी पार्टीचे उपाध्यक्ष धैर्यशील लोखंडे यांनी सांगितले.